«Túrkistan qalasyn túrki áleminiń mádenı-rýhanı ortalyǵy retinde damytý boıynsha bas jospardyń tujyrymdamasyn maquldaý týraly» Qazaqstan Respýblıkasy Prezıdentiniń Jarlyǵyna
TÚSINIKTEME
Memleket basshysynyń 2018 jylǵy 19 maýsymdaǵy №702 Jarlyǵymen Túrkistan qalasy Túrkistan oblysynyń ákimshilik ortalyǵy bolyp jarııalandy, bul Túrkistan qalasyn túrki áleminiń mádenı-rýhanı ortalyǵy retinde damytý boıynsha bas jospardyń tujyrymdamasyn (budan ári – Tujyrymdama) ázirleýge negiz boldy.
2000 jyly IýNESKO sheshimimen qala óziniń 1500 jyldyǵyn atap ótti.
2017 jyly Halyqaralyq túrki mádenıeti uıymyna (TÚRKSOI) múshe elderdiń mádenıet mınıstrleriniń turaqty keńesiniń 34-otyrysynda Túrkistan túrki áleminiń mádenı astanasy bolyp tanyldy.
Tujyrymdamanyń basty maqsaty mádenı-tarıhı jáne rýhanı muranyń saqtalýyn qamtamasyz etetin túrki áleminiń ortalyǵy retinde qalany odan ári damytýdyń negizgi baǵyttaryn aıqyndaý, sondaı-aq Túrkistandy mańyzdy óńirlik damý ortalyǵy etip qalyptastyrý bolyp tabylady.
Tujyrymdamada Túrkistan qalasynyń halyqaralyq, týrıstik jáne óńirlik turǵydan perspektıvalary aıqyndaldy, qalanyń áleýmettik-ekonomıkalyq áleýetin, onyń aýmaǵynyń perspektıvada josparly uıymdastyrylýyn, qala qurylysy aımaqtaryna bólinýin, ashyq qoǵamdyq keńistikterdiń, tarıhı-taqyryptyq parktiń, ekologııalyq standarttardyń, turǵyn úı-kommýnal-
dyq ınfraqurylymnyń júıesin qalyptastyrýdy qamtıtyn, turǵyn halyq sanynyń uzaq merzimdi kezeńge boljamdy ulǵaıýyn eskere otyryp keshendi damytý kózdelgen.
Bolashaqta Túrkistan qalasy álemdik deńgeıdegi týrızm men zııarat etý ortalyqtary sııaqty ákimshilik-iskerlik, rýhanı, mádenı jáne týrıstik ortalyq retinde qalyptasatyn bolady.
Ortalyq Azııanyń aýmaǵynda Uly Jibek jolynyń týrıstik marshrýtyn jańǵyrtý ekonomıkalyq damýǵa serpin beredi.
Túrkistanda qalanyń magıstraldary mańyndaǵy aýdandarda qoǵamdyq ortalyqtar qurý arqyly «polıortalyq» júıesi qamtamasyz etiledi. Árbir aýdanda qolaıly turǵyn úı jaǵdaılary jáne jumys isteýge, bilim alýǵa, demalýǵa tıisti múmkindikter jasalady.
Qalanyń ornyqty ekonomıkalyq damýyna jańa baǵyttardy engizý jańa kásiporyndar men ótkizý naryqtaryn keńeıtýge jáne qurýǵa, halyqtyń ál-aýqaty men tabysyn arttyrýǵa septigin tıgizedi.
Tujyrymdamada qalanyń kólik-tranzıttik áleýetin ulǵaıtý jáne ornyqty damýyn qamtamasyz etý maqsatynda ınfraqurylymyn nyǵaıtý josparlanǵan.
Prezıdent Ákimshiliginiń Memlekettik baqylaý jáne aýmaqtyq-uıymdastyrý jumysy bólimi
